A R S I P

  
  

Sipatu ni Amang Pandita

  

Tarsuruk Bulusan Ni Halak

  

Ballada Cap Bulan Di Sabulan

  

Tinggalhon Na Roa

  

Na Rarat Do Hamu...

  

Jagal Saur Matua

  

Nion Ambasang?

  

Mora Songgot

  

Tinggal Pangalahona Nama

  

Dang Boi Marutang Bapa

  

Tabo nai sup nai ateh......jora dilat-dilat


Posted by on Thursday, 03 November 2011 00:00

Ai kisah sitoho do on, alai attar hugatti goarna dohot alur ni suhutanna, sotung muruk innon tokoh suhutan i....

Tung massai las do roha molo nunga juppa tambaru, ai di tikki-tikki sisongonon ma boi iba pajuppa rippa dohot akka sisolhot. Molo di halak batak, pesta tambaru dang holan pesta na biasa sambing songon naniulahon ni akka nadeba, mar kambang apii, mardalani, dll. Alai di tikki on ma nasida marsijalangan tangan, rap martangiang, massisesaan dosa  mamuji tuhan i ala dilehon do hahipason mamolus taon naung salpu i. Di borngin parsirangan ni taon I, marpungu be do nasa ganup ripe ni halak batak, dungi dibaen ma partangiangan ujung taon. Salpu partangiangan i, rappak mangallang kambang loyang nang akka kue-kue na asing ma muse, sonang rap mekkel be. Nungnga gabe tradisi manang hasomalan di halak batak songoni. Gumodangan do marpungu mamestahon ari tambaru sian na marnatal.

Songoni do tahe nang AmnTolopan, nasida saripe. Ala mardomu ibana do sihahaan sian na lima keluarga na martinodohon na adong dijakarta on, jadi tu jabu nasida do marpungu molo masa tambaru. Ro do akka sisolhotna tu jabu I, akka ibotona, boru nasida, helana, anak nasida, sude ma tahe laho martangiang, ima partangiangan di ujung taon i.

Nang siJonaha pe, apala anak ni abang ni AmanTolopan na sian huta Pekan Baru, ala mardomu dang mulak ibana martambaru dihutana, ditonahon amanTolopan do ibana asa dohot marpungu. Ido tutu ikkon rappak pungu do sude, laho martangiang asa anggiat dilehon Tuhan I, taoin na imbaru I gabe taon parasirohaaon di keluarga i.

Bah,…..nga ro ho hape anaha?? Ninna amanTolopan dung dibereng si Jonaha ro jala songon na tabo gayana idaon. Sian pardompahan nian, songon na pos do roha mida ibana, pamatang todas, rupa dang pola talu jala dang pola sangka rohani jolam na holan Supir Tebbak ibana. Pinomat nian, molo binereng sian pangambe-ambena, partoru ma kepala bagian di instansi pemerintah ibana. Jala sada hasurungan ni ibana, ima taringot tu penampilan. Sai diatur ibana do penampilan nangpe so marhepeng. Sai dipatiop-tiop do bukkus ni sigaret Malboro luar i. Hape molo ni sigat olo do sipata kosong, manang so I, dipamasuk sigaret Sampurna Mild tubagasan. Sude ma tahe dang adong na hurang.

Sude do mamboto, attar jugul do ibana. Saminggu na salpu nunga ditonahon NaiTolopan, inangtuana I, asa tumibu ro di tanggal tolupulu sada i. Mardomu nunga sahata nasida namartinodohon nadijabu ni AmanTolopan marpungu nasida namartinodohon, mambaen partangiangan ujung taon.

“Hatop jo ho rot u jabu anaha, asa urupi hami mangaloppa lomok-lomok I, allangon botari anon”
“Olo inangtua…”

Alai nian, nunga diboto NaiTolopan boha sifat ni ibana, ai dinamasa pe parpunguan keluarga songon arisan, sai dipaleleng-leleng ibana do ro, molo nunga di etong ibana nunga naeng simpul mangan, ro ma ibana, jala tutu dah tor sude do manuru ibana mangan.
Ai soholan I dope, attar boi dohonon anggo si dua piring dohot tambuna habis do dang mareba-eba, ido Alana sai dipaudi-pudi imana mangan, asa godang do di ibana. Toho ma dang marnamullop ibana, sappe sidung diloppa nasida lomok-lomok on.

Dibotari nai, nunga simpul sude mangan, rap mekkkel be, ai dang piga-piga hali boi marpungu songon saonari akka namartinodohon on. Adong ma namarsuhutan, adong na marsatur, dungi akka ianakkon marmeami dijolo ni alaman, songoni nang inanta pe marsuhutan be. Sukkun-sukkun do rohanasida boasa dang marnamullop dope si Jonaha. Jala dung di telepon nasida, diboto ma na adong ninna kaerejona, jala satokkin nai sahat nama. Nunga sude mangantusi I, holan sidalianna do I, asa unang dohot do ibana marhoas-hobas.

Tepma, ro ma ibana mangambe lopas. Tor dialangi iban do sude akka tuturna I, adong amangudana, adong angina, adong namboruna nang akka na asing. Dungi disuru amanTolopan ma ibana marsipanganon. “Mangan ma ho anaha, holan ho nama nasomangan, buat ma disi…nga diboto ho i..”

Dungi tor hatop ma ibana lao tudapur, mambuat sandiri sipanganonna. Jala dang adong be donganna mangan di dapur I, massai sonang ma rohana. Dibuat ma hasiolomanna, saksang, ate-atena, hasahatanna, dungi disonduk ibana ma hua-huana sian hudon na bolon na adong disi. Mantap ma tahe..

“Mantap loppa-loppaan I bah amanguda” ninna ibana dungi sidung mangan ibana jala nunga marsaor dohot amangudana AmanTolopan.
“Ido…nga loja inangudam mangaloppa I, holan rupe mangan do diboto ho….”
“Olo uda, na sibuk do au….alai songon na hurang sira sup nai..”

“Sup nadia?” ninna NanTolopan manukkun. Tung massai longang ibana umbegesa, ai takkas do diboto nasida nakkinon naung habis supna. Jala so adong be be tinggal naggo saotik.
“Ima neh…sup na dihudon I, hurang sira saotik, alai hutambai kessap asin asa tabo….nion nai..” ninna ibana muse, hape dibuat ibana hua ni sup I, dipamasuk tu galas jala di sobur ibana muse.

“Bah…ai sup nadia do nimmu…” longang ma NanTolopan jala didulo tu dapur.
“ima neh nanguda, nadidapur i..” huhut ma dipatudu inganan ni sup i

Longang  ma nang AmanTolopan, ninna ma “Ai nga habis sup na sanakkining, haru hami hurangan, jala aek parbasuan namai dohot aek panussian ni piring, holi-holi na pinambolokkon, dipamasuk namboru tu hudon I naeng boanonna innon, allangon ni babina..”
“Hah!!...jadi dang sup i??”

“Daong,…nga habis supna…jora ho dilat-dilat, ima asa jolo sukkun dungi allang, taotton ma disi…inum m parbasuan i”

Dungi mambege I, gabe mekkel ma sude nasa jabu I, ai aek parbasuan na lumitok nama hape na ni inum ni ibana I, jala holi-holi eba-eba nama akka sup naniallangan ni ibana i.



Sumber: dontob

SIRINGKOT-RINGKOT | READ  2467x



Share

  PageRank Checking Icon
 
Copyright ©1998 - 2018 by Tobing. All rights reserved. | Powered by dontob

Horas to all of you.