Dang Boi Marutang Bapa

Saturday, 19 May 2007

Tobing.or.id, Tiruan nadenggan do pangalaho ni Aman Sorta di humaliang hutana, suang songon i do nang di angka pardonganonna, sai palilung nadenggan do godangan sian ibana. Lam tamba ma gok ni rohana dung adong muse anakna tinodohon ni boruna i, dibahen ma goar ni anakna i si Elon. Songon amangna i do nang pangalaho ni si Elon, ai nunga disuan amangna hian di ibana roha nadenggan dohot roha pintor di angka pangalaho dohot pambahenan.

Dung marumur si Elon 8 taon ringgas suruon ma ibana jala godang do manghalomohon ibana manghatai ala ni hamaloonna.

Barita ni lampedang marsaor bulung bira, barita hadengganon ni pangalaho ni Aman Sorta nunga sahat ro didia. Laos i do umbahen ibana dipabangkit gabe guru huria di luatna i. Sude do antong mangolophon, ai nang pe so singkola di guru huria ibana ndang adong be nahurang dibereng angka partohap ni huria i di Aman Sorta so pabangkitonna gabe guru huria.

Manungkoli do pangalaho ni Nan Sorta, denggan do dabudabuna, sinur pinahanna, lu pangomoanna jala tedak do rohana manjangkon angka tamue ni Aman Sorta na ro tu bagasna i mangangkupi Aman Sorta manotas angka rumang ni angka parsaoran ni natorop lumobi mamingkiri naringkot tu huriana i.

Di sada tingki ro do donganna sian huria na asing tu bagasna tongon ari Minggu. Nunga diontom roha ni nasida hian asa di huria ni Aman Sorta nasida marminggu. Ala nunga tar matas ari nasida na ro i, ndang sanga be Nan Sorta paradehon angkup ni sipanganon na jagar tu tamuena i. Dihusiphon ma tu Aman Sorta songon dia bahenonna unang songon na leas panjangkon ni nasida di tamuena i, alana holan gambas nama na adong di jabu.

Marpingkir ma Aman Sorta di hadogason ni Nan Sorta pasangaphon tamuena i, di ingot ma donganna si Lukkas parlapo tuak na sai girgir mambahen tambul sian jagal lumobi molo ari Minggu. Alai dietong ma na hurang sihumisik di sipeopanna manuhor tanggotanggo na hombar tu angka tamuena i; Ah, naburju do si Lukkas, ninna rohana, ala nunga hea ibana marutang tu lapona i, ndang hea dipaurak ibana. Disuru ma anakna si Elon manjumpangi si Lukkas manjalo jagal alai umpudi pe hepengna ninna. Olo Bapa, ninna si Elon huhut marlojong dompak lapo ni si Lukkas i.

Dung sahat si Elon tu lapo i, manigor dipaboa ma sangkapna sinuru ni amangna manjalo jagal, alai parpudi pe hepengna, ninna. Hohom ma si Lukkas marningot apala nantoari pe dibahen aturan ndang boi be marutang di lapona i, agia muse adong langgananna topet di lapo i umbege hata ni si Elon i. Bah, molo oloan anon, on ma jejerna angka na asing gabe marutang, sega ma lapo on, ninna rohana dibagasan. Ujungna dodok ma tu si Elon : “Mulai nantoari ndang boi be marutang, da! Paboa ma tu Bapa”, ninna.

Hohom ma mulak si Elon tu jabuna, mabiar ibana muruk maon amangna ala so adong diboan tinonahonna i. Bah, ndang hea dope so saut pangidoan ni Bapa molo disuru au, hape sahali on gabe ndang boi saut pangidoanna huulahon, ninna rohana dibagasan.

Dung sahat ibana diharbangan ni jabu nasida, ndang barani ibana paboahon namasa i tu amangna, ujungna didapothon ma inangna di dapur. “Oma, ndang dilehon si Lukkas au marutang, muruk ma anon Bapa tu au”, ninna ibana huhut sai unduk ibana ala ni biarna. “Ah, ndang pola beha i anakku, pos ma roham, au pe paboahon namasa i tu amangmu, dungi nunga adong be dison hupasuman laho lompan ni tamuenta i”, ninna Nan Sorta paposhon roha ni si Elon anak hasianna i. Ujungna pos ma roha ni si Elon agan pe ndang barani dope ibana manjumpanghon amangna i.

Dung masuk parmingguon, hobas ma nasida sajabu tu gareja rap dohot tamuena i. Diboan Nan Sorta do anakna si Elon i, jala nunga dihasomalhon hian i, asa lam peam rohana umbege angka hata nabadia dirohana.

Dung jumpang turpuk parjamitaon, hehe ma Aman Sorta tu langgatan jala tongam do antong idaon. Dimulai ma antong marjamita, jala mamuhai jamitana i nunga diparade hian sian hata natarsurat di buku Nabadia i, didok ma: “Tarsongon poda di hita sadarion tabege ma sian
sinurathon ni si Lukkas”, ninna. Diuduti ma muse tar songon na dipagogo saotik soarana: “Aha ma hata ni si Lukkas sadarion?”, ninna tarsongon na marpaima satongkin jala marpangondol. Tarsonggot ma si Elon, bah tong dope hape disungkun Bapa on, ninna rohana, ala ni ias ni rohana dohot hasomalanna manigor dialusi ma:
“Dang boi marutang Bapa”…