Na Rarat Do Hamu...

Tuesday, 21 August 2007

Tobing.or.id, Hinata so hinata do ianggo najolo i, tar hurang do dilehon tingki tu angka naborua marsingkola. Godang dope uju i angka halak Batak na so umboto manurat latin, lumobi ma i angka naboru. Alai longang do roha, ianggo tung habisuhon dohot angka ruhut ni ulaon, ndang talu naboru na so singkola i tu angka baoa,lumobi di hapadoton.
Alai bangko ma i di angka na so umboto surat, molo adong nanaeng siparsiajaran, ingkon sian parbinegean nama, diulahi, diingot, diuji dipajojor, dipatingkos muse. Songon i ma lam peam parbinegean. Marhite sian pangantusion sian hata nabinegena i ma dalanna marningot ginuruhonna i.

Songon i ma tongtong diulahon Guru Panuntun, dung dibangkit ibana gabe Guru di Huria Nalinggom. Nasabar do ibana, jala godang do dibahen dalan asa mura antusan ni namarguru tu ibana angka parbinotoan sian buku nabadia. Hinorhon ni i, tolop ma angka ruas uju i asa ibana mangajari angka ina namatua na so umboto surat ala hasabaron dohot bisukna i di ruhut haguruon. Lomo do tutu roha ni angka namarguru tu ibana i, agan pe dihilala ibana tar songon na maol, ala somalna mangajari naposo bulung do ibana nasailaon dohot angka ama naung umboto surat.

Lam tamba do antong angka ina namatua ro marguru tu ibana ala barita haburjuon ni Guru Panuntun dohot hasabaronna. Godang ma i hinorhon ni naung malo angka ina namarguru i pajojorhon angka natarsurat di buku nabadia, ujungna mangapian be ma nasida laos dipadohot dirina mangguruhon hata ni Debata sian Guru nabisuk i.

Uju i, hasomalan ni angka ina dohot ama di Luat Silinggom marnapuran do, laos ala ni i do umbahen tarbarita ‘demban silinggom’ ala mansai tabo do demban sian luat i. Angka ina na niajaran ni Guru Panuntun pe, sude do parnapuran.
Manang ala godang ni napuran natubu di luat i dohot tabona, sai tolu-tolu bulung do dibahen nasida sahali mangallang, sipata adong lobi sian i, lumobi ma i Ompu Sohagohan sahalak ina natumua di namarguru i.

Ala tar songon na hapor do simangkudap ni angka namarguru i mandok hata ala ni napuran i dohot sungkilna timbaho nasa-nasa gambiri bolonna, dibahen nasida ma patik nasida, ‘uju marguru unang marnapuran’. Sude do nasida tolop di patik pinungka na i, alai sipata ianggo Ompu Sohagohan olo do lupa di patik nasida i, laos tarboanna napuranna i di simangkudapna. Dung pe mandok hata ibana, tardapot ma namardemban do ibana, ujungna jolo diambolonghon ma jolo dembanna i asa dimulai parguruan.

Bangko ma i di angka na tamba parbinotoan, somalna, songon na manambori parbinotoan i, olo masisungkunan nasida sama nasida, uju borhat tu parguruan, mulak sian parguruan, jumpang dibalian, songon i nang borhat dohot mulak sian onan.

Partigatiga demban do Ompu Sohagohan. Adong do dua nari donganna saparguruan partigatiga, ima Nai Haposan partigatiga joring dohot palia, Nai Manoto partigatiga dagutdagut dohot hare jauk. Pahombar do inganan nasida di Onan Siomo.

Dilambung nasida i adong do sana nari ina, ima Nan Jongkas partigatiga lasiak dohot mobe, na so dung olo ditogihon nasida marguru. Talmis do ibana manghatai jala sai manalihi do tu donganna. Sasintongna hurang do parbinotoanna, alai paula do ibana di angka hatana songon namalo, jala dang olo talu marbada.
Dung sidung dipararak nasida be boniagana di Onan Siomo, marsituriak ma nasida natolu angka parngoluon nasida be sahat tu parguruan nasida i, paima ro angka paronan. Disungkun Nai Manoto ma Nai Haposan:
‘Ale angkang Nai Haposan, ai boi dope dipajojor ho nataguruhon nantoari sada?’.
‘Hurang dope anggia, alai sai diajari haham do ahu dijabu nian, sogot ra botoonhu ma i, alai ianggo nataguruhon na di minggu nasalpu nunga boi be hupajojor’, ninna.
‘Ah, ianggo apala na di minggu nasalpu do, au pe nunga boi’, ninna Ompu Sohagohan.
‘Antong dok ma jolo inong’, ninna Nai Manoto ma tu simatuana paidua i.
Alai ala mardemban do Ompu Sohagohan jala sungkilna pe nasa batu ni ambalang, gabe rahang ma simangkudapna mandok hatana, laos didok ma: ‘I ulana i, nga aong we hakai, ala aol u ewaka o hakai, ala ewaka o hakai’, ninna ma.
Mangihuthon parbinegean ni namangantusi tingkos do pinajojorna i, alai tu pinggol ni Nan Jongkas nunga manarisik, jala sibor ma ibana, ala dietong naoto do nasida jala asal dipandok hata na so toho. Mardongan muruk ma ibana mangantoi angka namarguru i:
‘Ah tung nararat do hamu namarguru i. Apala tangkas do binoto, jumolo dope HKBP sian HKI??..’